Ua faailoa e le Pacific Games Council poo le pulega o taaloga a le Pasefika e tatau ona saunia uma nofoaga e faia ai taaloga i Honiara i ni nai masina a o lumanai ai le tatalaina o taaloga i le aso 19 o Novema.
O le peresetene o Vidya Lakhan ma le ofisa sili o Andrew Minogue na o la asia Honiara i le vaiaso talu ai ma silasila ai i tapenaga mo lea faamoemoe mo le lona 17 ai lea o taaloga a le Pasefika.
Sa asia ai le tulaga o iai tapenaga a Honiara e le gata i nofoaga mo taaloga ae o le alatele foi faapea le malaevaalele faavaomalo.
Na saunoa le peresetene ua fiafia i le tulaga o iai tapenaga mo le tausaga nei ma o loo ogatasi pea ma le taimi nei ma le sauni atu i le faamoemoe i le faaiuga o le tausaga.
Sa feiloai atu sui o le council i le alii Palemia o le Atu Solomona Manasseh Sogavare ma ua lipotia foi e silia ma le $220 miliona tala Amerika le vaegatupe o loo tuu ane e Saina mo ia taaloga e aofia ai ma le fausiaina o le nofoaga autu poo le main stadium e faamautu uma iai meafai i ia taaloga.
