O le Iunivesite i Papaigalagala na taualuga iai le asiasiga a le Failautusi o le Matagaluega o le Va i Fafo a le Malo o Initia, Saurabh Kumar ma lana aumalaga e asia se tasi o poloketi sa faatupeina e le Malo o Initia. 

O lenei poloketi ua ta’ua o le Samoa Knowledge Society Initiative lea e mafai ai ona faaaogā auala faatekonolosi faaonaponei. 

Sa faatupeina e le Malo o Initia e tauala mai i le faalapotopotoga a Malo Aufaatasi i Samoa nei. 

Sa faaalia ai le loto faafetai o Kumar ona o loo vaaia le faaaogāina o nei fesoasoani e le gata mo fanau aoga ae o tupulaga o loo mulimuli mai. 

“E ese le fiafia o le loto i le vaavaai atu o iai se tāua o nei fesoasoani i fanau aoga aemaise lava i le tatala o le avanoa e mafai ai e soo se tasi ona access i faamaumauga tusi ma faamatalaga mo soo se vaega e faatino ai.

“O lea ua mae’a le laasaga muamua e pei ona ta’ua e le Polofesa o le a see le sā i lona vaega lua ma ia aua ne’i gata ai.” 

O se tasi o sui o mataupu tau faamaumauga faatekonolosi a le Iunivesite Professor Dr. Muagututia Ioana Chan Mow na auiliiliina vaega o lenei poloketi o loo iai nei. 

“O nei auala faatekonolosi ua mafai ai ona teuina faamaumauga o suesuega faaleaoaoga, o nisi o faamatalaga e aogā mo fanau aoga ma o loo mafai ona maua uma i luga o upega o faamatalaga a le Iunivesite.

“O se tasi o vaega o le maua ai lea o avanoa e aooga fua ai fanau aoga i mataupu o loo ofoina mai i luga o upega tafailagi e pei o le Coursera, Grow with Goggle ma isi.

“Ua silia ma le 3000 faamaumauga ua mae’a ona teuina i luga o nei auala faatekonolosi mai le Iunivesite e aofia ai tusi, o faamaumauga tāua i talaaga o Samoa i Gagana Peretania ma le Gagana Samoa ma nisi o faamatalaga e tāua mo suesuega faaleaoaoga.

“O le taimi nei o loo faagasolo ai ona faia aoaoga i nisi o Matagaluega a le Malo ina ia malamalama ma maua foi le tomai e faaaogāina ai nei vaega.” 

O le poloketi lenei na tatalaina aloaia i le amataga o le tausaga ua mavae ma o loo faaauauina pea ina ia aua ne’i muta ai nei avanoa mo le fesoasoani ai i aoaoga a le fanau faatasi ai ma le auaunaga o loo ofoina mo soo se tagata e ala i faamaumauga.