O Samoa o se tasi o atunuu o loo aofia ai i totonu o se fesoasoani o le a faamatuu mai e le Malo o Peretania e ala i se faigapaaga na sainia ma se tasi o auaunaga tau le siosiomaga a le Pasefika le Global Green Growth Institute (G.G.G.I).
I lipoti mai le G.G.G.I. o le auga o lenei fesoasoani o le a agai lea e lagolagoina ai poloketi ma vaega tau le siosiomaga ma e lua tausaga o le a faatinoina ai ma le faamoemoe e toe laasia atu le vaega lona lua.
O atunuu o loo aofia ai i lenei fesoasoani e aofia ai Fiti, Papua Niu Kini, Toga, Vanuatu ma le Atu Solomona.
O lenei faigapaaga o le a lagolagoina atunuu o le Pasefika o loo ua ta’ua e ala i auala e ao ona faatino ma suesuega talafeagai mo le foia ai o suiga o le tau.
O le faaitiitia o kasa kapone e pei ona tutusa ma fuafuaga a le National Adaptation Plans e tauala atu lea i le mafai ona faasoaina vaega seleni o loo faamatuu lea i mataupu i suiga o le tau.
E pei ona faailoa e le Hai Komesina o Peretania Brian Jones e tusa ai o lenei faigapaaga.
“E lē tau aoaoina e Peretania le Pasefika i tulaga o le nofo saogalemu ma tapena i vaega e pei o suiga o le tau o loo iai nei ae e iai le tomai e galulue ai ma nisi o faletupe tetele ma paaga mai le Pasefika e lagolagoina ma faufautua i le faaaogāina o nei seleni o le vaega tāua lena.
“E fiafia ai e galulue soosootau’au ma le G.G.G.I. e ofoina atu lenei auaunaga o tomai po technical expertise e agai sa’o lava i vaega a Malo o atunuu o le Pasefika ina ia fausia ma faaauauina le faaaogāina o seleni i vaega o moomia ai.”
