Ua aofia nei Malo Aufaatasi i le uluai feagaiga e puipui ai le sami ma faasao mea o loo ola i ogasami faavaomalo ma ua faamauina ai ma se tulaga tāua tele i le mae’a o le 20 o tausaga o taumafai mai lenei faamoemoe, o se faamatalaga lea mai le failautusi o Malo Aufaatasi, Antonio Guterres.
Ua faia lea maliega e pei ona lipoti e le ABC, ina ua mae’a ona faia se maliega a atunuu e 100 e tusa o le mataupu lea aemaise o le tele o feutanaiga ua silia ma le 15 tausaga o faia i le va o atunuu.
O lea la maliega o le a tatala mo le sainia e atunuu i Niu Ioka mo le lua tausaga e amata i le aso 20 o Setema o le tausaga nei.
O le maliega ua faaigoa o le High Seas Treaty.
