Ua manuia taumafaiga a alo o Samoa o loo aooga i le Stanford University, o Ari Patu ma Brandy Atuatasi, ina ia faaaofia le gagana Samoa i polokalame o mataupu e a’oa’oina i totonu o le iunivesite.
Ta’ua e Atuatasi, “O la tatou gagana, la tatou aganuu, o vaega ia ua tatau ma onomea ona tatou finau ai.” Fai mai a ia, soo se tasi e fia tautala i le gagana Samoa, e tatau ona mafai ona ia faia.
Faaalia e Atuatasi le fiafia o le au aooga o loo auai i le vasega e a’oa’o ai le gagana Samoa, ona ua mafai ona latou a’oa’oina le gagana, ma o se faamanuiaga moni mo i latou.
Na faapena foi se manatu o Patu e pei ona ia faapea mai, o ona lagona e naunau e opogi ona tagata Samoa ma lana aganuu, o iina na mafua ai ona ia finau lava ina ia faamaite le amataina o ni vasega e a’oa’o ai le gagana Samoa i totonu o le iunivesite a Standford.
O le amataga lena na faatoa ia silafia ai foi le tele o isi vala o le aganuu a Samoa sa ia lei silafia muamua, ae o lea la ua mafai nei ona ia a’oa’oina ma malamalama i ai.
O le tina ia Tali’ilagi Young ma lona alo le alii o Chris Young, o i laua ia o loo galulue e faatino lenei vasega, ma o le Aso Gafua o le vaiaso talu ai na amata ai le uluai vasega na faatino i luga o le Zoom.
Mo le silafia o le Stanford University e lona tolu i le faasologa o iunivesite pito maualuluga i totonu o le lalolagi e tusa ai ma lipoti o le 2023 o le faatulagaina o iunivesite tetele o le lalolagi.
