O taumafaiga ina ia unaia le atina’eina o tagata uma e iai tupulaga talavou, tina ma tamaitai, alii, fanau ma i latou e iai aafoaga tumau o se galuega fai faatasi lea a Matagaluega a le Malo. 

E pei ona ta’ua i faamatalaga tusitusia mai le Matagaluega a Tina ma Tamaitai, e le o se vaega fou lea o le faipaaga ai o le Matagaluega a Tina ma Tamaitai ma le Matagaluega o Aoga ae peitai o se avanoa faapitoa mo lea faigapaaga, ina ua tāpā le fesoasoani a le Asosi a Faiaoga i Samoa e ala i ana polokalame tau atina’e o tupulaga talavou e faia ai polokalame faalauiloa ma a’oa’oga faapitoa mo faiaoga talavou o Itumalo o Sagaga ma Faleata. 

E lua aso na faatautaia ai lenei polokalame e aofia ai ma Asiasi Aoga ma Pule Aoga o aoga tulagalua ma Kolisi i nei itumalo. 

Na saunoa le Pule Sili o le Matagaluega, Dr. Mema Motusaga e momoli se feau tāua o loo afifi mai ai i lea polokalame. 

“Ia maua pea le onosai ma le malosi i Susuga i Faiaoga ia manatua le tāua o le Malu Apele Ola o le sao o alo ma fanau, o i latou e iai aafiaga tumau ma i latou o loo aafia i faafitauli i totonu o aiga.”

O le sini autu lava o nei polokalame ia ao ona malamalama ma silafia le tulaga o mataupu i sauaga, o atina’e e ao ina fausia mo le manuia lautele ma nisi o vaega e patino lea i le Asosi o faiaoga i Samoa. 

I le uluai aso o lenei polokalame na faaalia ai vaega e ao ina puipuia ai tupulaga talavou mai le tele o faafitauli o loo alia’e mai e faasaga ia i latou.

O le aso mulimuli na faia ai galuega taulima e pei o le gaosiaina o le siapo, elei, lalagaina o le ietoga ma le faia o teu fugalaau, o lenei vaega e faasoa ai le tomai e ala i measina a le atunuu lea o loo mafai ona atina’e ai nisi o aiga i lo latou tamaoaiga. 

O le agaga faafetai mai le sui a le Asosi o faiaoga i Samoa, Gatoloai Tili Afamasaga ona o le ‘oa ua tapu’e e faiaoga mai lenei polokalame e faufau ai lo latou sa e ala i le tautua ma le auaunaga o loo a’otauina ai alo ma fanau a le atunuu mo le lumanai.