Ua avea Samoa ma fetu pupula i le silasila mamao mai a faamasino ma loia o le Pasefika e aofia ai Niu Sila ma Ausetalia, ona o loo tuufesili pe aisea e mafai ai ona taunuu manuia soalaupulega o mataupu tau faamasinoga i lo tatou atunuu e aunoa ma le faa’au’au e faia ni faamasinoga, ae e lē o mafai ona tupu i o latou atunuu.

O se tasi lea o vaega o loo aoao manogi mai ai sui o le sosaiete a loia o le Pasefika i le latou fono muamua ua talimalo ai le sosaiete a loia i Samoa lea na tatala aloaia i le Aso Lulu o lenei vaiaso.

Faaalia e le Peresitene o le sosaiete a loia i Samoa o se tasi lea o vaaiga tāua i le silasila mai a loia ma faamasino o isi atunuu o le Pasefika ia Samoa ma o se tasi lea o a latou asamoga i le fono muamua a le asosi o loia o le Pasefika ua usuia i lo tatou atunuu i lenei vaiaso. 

Faaalia foi e le Peresitene o le sosaiete a loia i Samoa le susuga Alex Su’a o le toatele o sui auai o le asosi o alo ma fanau a Samoa o loo faamautu i Niu Sila ma Ausetalia.

E tusa ma le 200 o loo auai i le fonotaga e aofia ai ma loia ma faamasino i lo tatou atunuu.

O le tatou tali faaaloalo masani pe a taunuu ni malo o le ‘ava o le feiloaiga na saunia e le sosaiete a loia i Samoa e tomua ai polokalame o le fonotaga ua fuafua e mae’a i le faaiuga o lenei vaiaso.