Ua tatala ai nei le faitoto’a e tasi i luga o fesoota’iga tau initaneti ma auala o fesoota’iga faatekonolosi ua tuu faatasia uma ai auaunaga eseese a le malo o Samoa.
O le sini taula’i o lea faamoemoe ia faafaigofie ona maua vave ai faiga faavae ma tulafono o loo lima ta’ita’iina ai auaunaga faatino uma a le malo.
O le tasi o sini autū e pei ona faailoa i le saunoaga a le Sui Palemia le afioga Toelupe Maoiautele Poumulinuku Onesemo na tatala ai lea fesoota’iga, ia tasi le auaunaga faatekonolosi e maua uma ai e tagata faigaluega a le malo faamatalaga.
Ua faailoa ai foi e le Sui Palemia i le faalauiloaina ma le tatalaina o lea auala o fesoota’iga o le matāgaluega o tupe a le malo, matāgaluega o fesoota’iga ma faamatalaga faatekonolosi, ma le ofisa o le Palemia o le a ta’ita’i i lea fuafuaga i se faiga e galulue faatasi ai ma isi auaunaga a le malo ina ia mafai ona fesoota’i i lea auala e faafaigofie ai mea uma o lenei vaitau.
Ua faaigoaina ai lea auala mo fesoota’iga o le one government portal poo le Ao – Tasi Faamatalaga mo Auaunaga Uma a le Malo o Samoa.
Puna o Faamatalaga: https://mygov.gov.ws
