O lē sa avea ma Peresetene o Amerika i tausaga ua tuana’i, George W Bush sa ta’ita’ia i latou ua faaoo atu faamaisega ma alofa’aga mo lē sa avea muamua foi ma Sui Peresetene o Amerika o Dick Cheney, lea na tuumalo i le amataga o le vaiaso ina ua 84 tausaga o lona soifua.
E silafia e le to’atele o Cheney le isi Sui Peresetene o Amerika sa malosi lona tula’i mai i le talafaasolopito o le atunuu aemaise le taimi o le faasagatau atu o Amerika i le aufaatupu faalavelave, war on terror aemaise le osofa’iga o Iraq i le 2003.
Saunoa Bush i lipoti a le BBC o le a manatua pea Dick Cheney i talafaasolopito o Amerika, o ia le isi auauna aupito lelei i lana foi tupulaga, telē le tomai ma le silafia i ona tiute ma sa faamoemoeina foi i lona tula’i mai.
Saunoa foi le isi Peresetene sa iai o Amerika, Bill Clinton e ui e tele taimi sa feeseesea’i ai lagona ma Cheney ae e na te faaaloalogia lava ona o le lotonuu aemaise o lona soifua auauna.
E lē o iai se faamatalaga ua faia a le Peresetene o iai nei, Donald Trump i le tuumalo o Cheney ae ua ta’ua i lipoti o loo ia silafia ma ua faatino foi tulaga masani i le Fale Pa’epa’e e pei o le sisi faavaeloto o le tagāvai o le atunuu e faailoa ai le faaaloalo i lē sa avea ma Sui Peresetene i tausaga ua tuana’i.
Puna o Faamatalaga: https://www.bbc.com/news/articles/clyzm1j6l76o
