Ua faatonu e le faigāmalo a Trump setete o le atunuu ina ia taofia le toe totogi o ni penefiti tau taumafa i aiga e vaivai le tamaoaiga i Amerika ma le faamatalaga e lē faatagaina lea tulaga.
Ta’ua e le BBC o se memo poo se faatonuga mai le ofisa o Faato’aga a Amerika lea latou te faagaioia le polokalame lea o le Supplemental Nutrition Assistance Program poo le SNAP ua ta’ua ai o setete e mafai ona latou kiliva le 65 pasene o penefiti mai lea polokalame i le mae’a ona tuu ane le faatagana lea mai le Faamasinoga Maualuga ina ia taofia lea tulaga se’ia mae’a matāupu faaletulafono o loo aofia ai.
E silia ma le 42 miliona tagata Amerika e faalagolago i taumafa mai le polokalame lea peita’i e na o se vaega o ia penefiti na maua i le masina nei ona o le tulaga ua iai aafiaga o le tapunia o isi auaunaga a le faigāmalo.
Ua faailoa o isi setete sa faaoo lava ona totogi atoa penefiti i tagata ina ua faatonuina e se poloa’iga mai le faamasino i le faamasinoga sa ia faatonu ai le faatupe atoa o penefiti ma le faatupeina o lea polokalame.
O le tala aupito lata mai la ua faailoa ai e le BBC o lea ua tuu ane le faatonuga mulimuli lea mai le ofisa o le malo e taofi loa ona toe totogi le aofa’iga atoa, 100 pasene o penefiti i lalo o le polokalame ma ia toe faafoi ane nisi tupe ua mae’a faamatuu ae ua silia i le 65 pasene ua mae’a totogiina i lalo o le polokalame.
Fai mai a le usita’ia e setete lea faatonuga e ono faalēaogāina a latou funding mo tau faaleofisa ma ono iai nisi aafiaga.
Puna o Faamatalaga: https://www.bbc.com/news/articles/cly9pggxydeo
