O le fono po a le Palemene i le Aso Lua 21 o Setema na amata i le tali ai le tamaitai Palemia faapea Minisita o lana Kapeneta i fesili aemaise lagona faaalia o sui faipule o le Palemene e agai lea i le tala autu o le tupe muamua a le faigamalo fou lea na faamaea saunoaga faalauaitele i le folasaga a le Taitai o le ituagai le susuga Tuilaepa Lupesoliai Sailele Malielegaoi.
O saunoaga lava Ia a sui faipule e to’a 18 a le ituagai e lilifa lava i le lagolagoina o fuafuaga ua taoto a le malo i lana fuafuaga tau tupe ae feololo foi finagalo o faipule o le itu o loo agaia le Mālō o le fesiligia lea o le tai miliona tala mo itumalo faapalota e 51. O le sootaga foi o le penisione mo tama ma Tina matutua i latou ua aulia le 65 tausaga o le soifua ma sili atu.
O le Minisita o o Tiute ma Tupe maua o le afioga i le Sui Palemia Tuala Tevaga Iosefo Ponifasio ua ia faailoa i le Palemene le silasila ai o lana matagaluega i le mataupu i lāfoga totogi a faifeau aemaise o tupe maua e faatino ai le fuafuaga o le 1 le miliona mo itumalo faapalota e 51.
Taua e Tuala “O le tulaga i le lāfoga mo faifeau ua faamauina nei le iloiloga a le malo o loo galulue ai le matagaluega ma le Ofisa o le Loia Sili aua se faituaga e tuuina atu i le Mālō mo le toe Iloiloina o lenei tulafono.
O loo tapena nei se faiga faavae e faatino ai ni suiga e alatatau ona fai auā se tapenaga mae’ae’a o le tatou Mālō ma ni suiga talafeagai o le a faapea ona fai”
Na ia suanoa foi “E pei ona māua a le saunoaga foi aemaise o le faatulagaina o le paketi o loo lelei le aoina o tatou tupe maua, e iai le manatu o le a iai le tupe faasilia i le aoina o tatou tupe e maua lea i lenei tausaga ae faapea foi le tausaga o i luma. Mo le silafia i le tatou Palemene aemaise le faafofoga mai o Samoa o loo fai lava sina tele o tupe o loo i tua o tupe e le’o aoina, a galulue le matagaluega e ao
o mai tupe na i totonu e iai lo’u talitonuga o le a leai se tatou popole i le tatou 51 miliona”.
O loo faaauau pea ona tali Minisita o le Kapeneta i saunoaga faalauaitele a sui faipule o le fono aoao faitulafono e agai lea i le tala autu o le tupe mo le tausaga faaletupe 2021-2022
