O le Aso Faraile muamua o lenei masina fou o Tesema ua amata saini ai le tai miliona tala o le polokalame o le atinae o nuu ma afioaga o itumalo faapalota e 51 o le atunuu.
Ua faailoa lea fuafuaga i se finagalo o le minisita o loo vaaia le poloketi lenei i se lipoti a le vaega faasalalau o le Talamua ma ia ta’ua ai e 24 itumalo ua mautu a latou tapenaga uma ma ua faamalieina taiala o le poloketi, o le a tauaaoina le tasi le miliona.
O le 15 o itumalo o le a saini i le Aso Lua asau ma faamautu lo latou maua loa o le miliona ae iva itumalo o le a saini i le Aso Faraile le faaiuga o lenei vaiaso.
E manino mai i le 24 itumalo o le a muamua pa’i lima i le tasi le miliona, ua faamalieina le minisita ma le matagaluega o tina ma tamaitai atinae o afioaga ma aga fesootai, faapea le komiti a le Malo o loo faamalumalu i le vaaiga o le poloketi, i le faaaogaina o le lua selau afe tala muamua ua mae’a ona faaaoga mo le faatuina o ofisa tutotonu o fono faavae, ma faatau ai foi masini ma isi totoga mo ofisa aemaise o alauni o komiti filifilia ai ia itumalo.
Ua toe ave le faamanatu a le minisita i sui faipule ma tagata o itumalo palota, e le o se tufaga tupe le faamoemoe o le poloketi, ma a mautinoa se tulaga faapea ua tupu, e le agavaa se itumalo na te faia i le miliona tala.
O le faaiuga o le masina faaiu o lenei tausaga ua amatalia, le avanoa mulimuli ua toe tuu atu i itumalo e lei mautu lava le faaaogaina o le 200 afe tala ma o loo fetotoa’i pea i sui o komiti, e tatau ona faamautu uma ai a latou tapenaga.
I se isi lipoti lata mai o lenei mataupu, e tusa ma le 12 itumalo ua saini i le asō maliega tau tupe muamua o le poloketi o le $1miliona.
Itumalo ua saini i le asō:
Faasāleleaga 3; Gaga’emauga 1; Vaimauga 2; Faleata 2; Gaga’emauga 2; Faasaleleaga 4; Falealili 2; Palauili 3; Falealili 1; Falealupo; Palauli 1; Palauli 2.
