I le aso muamua o le taamilosaga o le suega siamupini mo le itulagi lenei lea o loo talimalo ai Niu Sila i Manukau, Aukilani, (Oceania Championships 2024 and Olympic Qualifier) ua vaaia ai le amata faasolosolo ona maua pine auro a le au siisii a Samoa o loo auai atu iai.
O le alii o Vaipava Nevo Ioane na maua le uluai pine auro mo Samoa i le vaega 67kilo le mamafa.
I le faatalanoaga a lea alii ma nisi o sui o ofisa faasalalau i Niu Sila na ia faafetaia ai le tapuaiga a le atunuu.
Ta’ua e lea alo o le atunuu e ui o loo manu’a peitai o le manatu i le tapuaiga e lē gata i aiga aemaise o le atunuu na faamalosia ai lona loto ina ia finau mo se pine auro.
O le pine auro lona lua na maua e le alii o John Tafi, i le vaega matutua o le 73kilo le mamafa, ma sa iai foi se matati’a fou sa faatū e lea alii i le vaega o le sii malolo.
O le pine auro lona tolu mo le ‘au a Samoa, o le alii talavou 16 tausaga le matua, o Tovio Ah Chong i le vaega o alii i le 81kilo le mamafa ma ua faatu ai foi e Tovio se matati’a fou a le OCEANIA i le sii Clean + Jerk.
Ma le pine auro lona fā ua maua mai le isi foi alii 16 tausaga le matua, o Emanuel Ulimasao, i le vaega o alii i le 89kilo le mamafa.
O loo faaauau pea lenei taamilosaga ma o le aso a taeao, Aso Toonai, 24 Fepuari e faaiuina ai.
E 21 isi atunuu o le itulagi lenei o loo tauva faatasi ma Samoa.
