E amata a taeao ona mafai ona maua peimeni mo aiga Aukilani na aafia ona o lologa.

O le faamaoniga lea mai le Auckland Council a o faaauau ai iloiloga o talosaga ua tuuina atu mai aiga pagatia o Aukilani.

O peimeni nei o loo sau mai le silia ma le $1.3 miliona relief fund, ma talu mai le Aso Lua o le vaiaso talu ai seia oo mai i le faaiuga o le vaiaso ua silia ma le 300 talosaga ua faaulu atu.

O loo iai i totonu o le relief fund lenei le $1.1 miliona mai le malo, ma o lea na faaopoopo iai e le council a Aukilani le isi $100,000

E ese mai le malo o lea foi o loo foai iai le vaega tuma’oti, e pei ona iai le faletupe a le ANZ lea ua ia foaia foi le $100,000.

O peimeni mai talosaga faaulu o le a fua i le tele o mea ua faaleaogaina, faaopoopo iai ua leai lava se isi mea e sulu iai mo se fesoasoani ma ona o lea, e le tutusa uma peimeni a tagata o le a maua, ma e ono iai foi talosaga e teena.

E ese mai i aiga, o loo mafai foi ona faatalosaga ai faalapotoptoga e lagolago ai le komiuniti lautele.

O talosaga o loo mafai ona faaulu online, ma a moomia le fesoasoani ona valaau lea o le telefoni a le Auckland Council i totonu o itula faigaluega.