A lelei ona a’oa’oina tagata faigaluega i le faafoeina o se pisinisi laititi ua tau amata, e le fesiligia le sologa manuia ma taunuu i se tulaga faaeaina.
O le naunautaiga lea o le Pulega o le Atinae o Pisinisi laiti i lo tatou atunuu le Samoa Business Hub auā a a’oa’oina lelei tagata faigaluega i tomai e faafoe ai se pisinisi ma a’oa’o ia silafia gaioiga e tatau ona faatino pe a tulai mai ni faafitauli o le a mafai ona fo’ia ai nisi tulaga ma’ale’ale e afāina ai le pisinisi.
O le amataga o lenei tausaga fou o le a faagasolo ai se isi a’oa’oga mo tagata faigaluega i pisinisi laiti mo le faamoemoe ia mae’a le ono masina ua ‘ausia le tulaga e maua ai le tusipasi o le vaega lona lua poo le level II Certificate in Small Business Operation.
O lea tusipasi ua faamauina aloa’ia e le Pulega o Tusipasi ma Faailoga Taualoa a Samoa i se taumafaiga e siitia tomai ma agavaa o tagata o tautua i le faafoeina o pisinisi laiti i lo tatou atunuu.
O le faaiuga o le tausaga na tea nei e 43 tagata sa faamanuiaina ai ina ua ma’ea foi le ono masina o a’oa’oga sa feagai ma i latou.
O se a’oa’oga o loo lagolagoina lona faatupega e le UNDP ma le UN Women faapea ona galulue ai ma le Pulega o Atinae o Pisinisi Laiti, ma Matagaluega a le Malo e pei o Leoleo, Matagaluega o Pisinisi, Alamanuia ma Leipa, le Matagaluega o Tupe Maua, Matagaluega o le Tiute ma le Faalapotopotoga o le Koluse Mūmū.
