Amata le ASB Polyfest mo lenei tausaga 2026

O le asō lea ua amatalia ai le aso faamanatu poo le festival o faaaliga o tu ma aganuu a fanau a’oga maualuluga, le ASB Polyfest a Aukilani e pei ona faia i tausaga ta’itasi.

Ae o le taimi muamua lenei o le a iai se suiga i lenei faatasiga faapitoa, o le a lua nofoaga e faatino ai lenei faamoemoe.

O le asō na tatala aloa’ia ai le ASB Polyfest, na amata i se sauniga na sisiiina ai le fu’a i le Manukau Sports Bowl.

O le a iai fata e lima poo stage e faia ai faafiafiaga a fanau e faaali ai siva a atunuu eseese e pei o le Cook Islands, Niue, Samoa ma Tonga, ma le fata mo faaaliga a fanau mai isi aganuu eseese Diversity.

O le a faia ai faaaliga e lē gata o siva, ae o tauvaga o tautalaga mai gagana eseese a le Pasefika ma isi gagana e amata atu nei se’ia oo i le Aso Toona’i, se’i vagana ai le fata a Samoa, e na o faafiafiaga ae o le a faato’ā faatino le tauvaga o tautalaga i le vaiaso e faamamalu ai le gagana Samoa.

O le isi nofoaga o le a faia ai le fata a Maori, o le Manukau’s Due Drop Event Centre, ma ua faatulaga o le a faia faafiafiaga i lena nofoaga mai le aso 30 o Mati e oo i le aso 2 o Aperila.

O le tausaga lenei e faailoga ai le 51 tausaga le umi talu ona tapena mai le Polyfest.

E silia ma le 80,000 tagata ua faatalitalia o le a auai atu i lenei faaaliga, ma e ui lava e taula’i faaaliga o lenei faamoemoe i faatinoga a fanau a’oga a le Pasefika, ae fai mai i latou o loo faamaopoopoina lenei faamoemoe, o se taimi tāua lenei ua faamanatu ai le tele o tagata mai aganuu eseese i Niu Sila.

I se faatalanoaga a le tama’ita’i faatonu o lenei festival, Seuli Terri Leo-Mau’u ma le Pacific Waves, na ia ta’ua ai, e 263 kulupu mai a’oga e 73 ua uma ona lesitala e auai i le Polyfest o lenei tausaga.

Saunoa Seiuli, e matuā to’atele i latou ua ofoina fua o latou taimi e fesoasoani ai i le faamaopoopoina o lenei faamoemoe ina ia faamautinoa e sologa lelei mea uma, aemaise o lea ua lua nofoaga o le a faatino ai le faaaliga i lenei tausaga.

Tau ina ia manuia le faagasologa o le faamoemoe o fanau a’oga mai a’oga maualuluga i lenei tausaga.

Puna o Faamatalaga: https://www.rnz.co.nz/international/pacific-news/589855/asb-polyfest-the-world-s-largest-secondary-school-pasifika-cultural-festival-returns-to-auckland?fbclid=IwY2xjawQmup1leHRuA2FlbQIxMABicmlkETFJa2d1dXgzQktuR2xpanZTc3J0YwZhcHBfaWQQMjIyMDM5MTc4ODIwMDg5MgABHgmUAlD-W5pgs7zlqAkuAO6TOiTJimIi0qfnQT76OytM4UuAo0nFzu7gLp2N_aem_cb_6qnxEwrcvy8EFvA3BBg