O falemai faaitumalo i Satupa’itea ma Sataua i Savaii o le a amata ai le galuega o le fausia o fale apitaga e faamautu ma nonofo ai foma’i o loo galulue i ia falemai faaitumalo.

Ua faailoa e le pulega o le matagaluega lea tapenaga, i le polokalame o le soifua maloloina o le atunuu atoa, ma faailoa ai foi o nisi o falemai faaitumalo o loo iai tapenaga e lei mae’a, e faasino lea i fanua e fausia ai fale apitaga.

O le falemai faaitumalo i Foailalo ua mae’a tauaao e le faatonu sili o le matagaluega le ioega a matai ma aiga aemaise o alii ma faipule e mafai ai ona faatino lea galuega.

Na faaalia e se ofisa sinia o lea matagaluega le afioga Leota Oliva Taituuga, o le fausia o fale apitaga mo foma’i, o le a faatino ai foi ma galuega o le toe faaopoopoina o vaega o falemai faaitumalo.

O finagalo faaalia mai le pulega o le matagaluega le Faatonu Sili ma le sui faatonu sili faapea le ofisa sinia le afioga Leota Oliva Taituuga.

O saunoga faalauaitele a sui usufono o le Palemene i le tala autu o le tupe talu ai nei, sa laga ai finagalo i le toe faaleleia o falemai faaitumalo ma le fausia o fale apitaga o fomai o loo galulue ai. 

O se tasi o galuega o loo tapena nei e le matagaluega, o le toe faateleina o le fale maliu i le maota gasegase o Tupua Tamasese Meaole i Motootua, lea e na o 12 maliu o loo mafai ona tuu ai i le taimi nei.

O loo fuafua pe oo i le 30 tino maliliu o le a mafai ona tuu i lea nofoaga pe a maea le toe faateleina o le falemaliu.