O le mau tauave faalesoifua maloloina e sili le puipuia i lo le tau togafitia.
O le faamoemoe autu lea o se fesoasoani a le Malo Amerika o le a faatino i totonu o le lua tausaga e agai tonu i nofoaga e sili ona lamatia i suiga o le tau, aemaise i le aafia ai o le soifua lelei ma le ola maloloina o tagata.
O Malololelei ua amatalia ai lea poloketi fou a lea Malo e pei ona faalauiloa aloaia i le vaiaso nei e le Amepasa o Amerika mo Samoa ia Tom Udall.
Faaalia e le alii Amepasa o se poloketi o le a manuia ai tagata i le maua ai o le suavai mamā ma saogalemu mo le faaaogāina, faapea le saogalemu mai vai lafoa’i i le ma le tasi o tulaga tāua, o le lava tapena ai o tagata i taimi o faalavelave faalenatura.
O le faalavelave faalenatura lea na aafia ai le atunuu tuaoi o Tonga ina ua sasao se maugamu mai lalo o le aliitai o le sami, ma tulai mai ai se sunami na aafia ai nisi o tagata o lea atunuu, e mafai ona maua le fesoasoani mai lea poloketi ma o Tonga le isi atunuu ua aofia i le fesoasoani lenei, faapea nisi o motu o le Pasefika faapei foi ona faamanuiaina ai ma Samoa.
O loo taulai le manulauti o lea poloketi i le 12 afe tagata e tatau ona manuia ai.
