O le kamupani pito tele ana supamaketi, le Frankies i Samoa o loo tumutumu iai tagata i faatauga o taumafa eseese aemaise aano o manufasi e pei o moa, o le uluai pisinisi lea ua amata nei sana tautua fou, o le nofoaga lea ua faamamā, ma fasi ai moa ma tuupepa poo pusa foi, i le faamoemoe e faatau mo le fofoga taumafa o le atunuu.
O se tasi lea o taumafaiga ua lagolago e le Malo e ala i le matagaluega o faatoaga, lafumanu ma faigafaiva i le naunautaiga ia aua ne’i toe alu alu poloka le maua o aano o moa, pe a oo ina tuai mai vaa la’uoloa poo le tau faasoa foi o ia taumafa pe a oo ina faaitiitia.
E tusa ma le tasi le afe tone le mamafa o aano o moa e aumai mai fafo mo le atunuu i tausaga taitasi ma e faaalu ai le tusa ma le 60 miliona tala, peitai o le silasila mamao o le taumafaiga ua amatamea ai nei le kamupani a Frankies, a faateleina lafumoa e faaaoga lo latou aano mo taumafa i atina’e o le tasi le miliona tala mo itumalo, e le tau fesiligia le tele o le moa o le a fasi ma faatau mo taumafa ma e ono pa’ū ai foi ma le tau.
O le tatalaina o lea taumafaiga a le kamupani a Frankies sa asiasia ai e le taitaifono o le komiti galue mo oloa mai Samoa e auina i fafo ma sui o lea komiti i le fia molimauina o le taumafaiga a lea faipisinisi i lo tatou atunuu.
O le nofoaga ua faatino ai lea taumafaiga ua fausia i Mulifanua i se fanua o le Faalapotopotoga o le Esetete Tausi a Samoa.
