O lea ua amata faasau le suavai leaga faaniukilia a Iapani ua uma ona toe vaimamā i ogasami o le Pasefika.
O le itula e 4 i le afiafi ananafi i le taimi Niu Sila na lafoai mai ai le faiga o loo auaua’i mai ai le silia ma le tasi miliona tone o suavai leaga nei i ogasami o le Pasefika, ma o loo fuafua e oo atu i le 30 i le 40 tausaga e faia ai.
O suavai leaga nei na faaleagaina i le tsunami i le 12 tausaga talu ai, ma mai le pulega o le malosiaga tau eletise a Iapani, o loo mautinoa le saogalemu o le suavai ua lafoai mai i ogasami o le Pasefika.
A o lagolagoina e nisi o atumotu o le Pasefika le fuafuaga a Iapani, ae oo mai lava i le afiafi ananafi e lē o auai ai finagalo o nisi o taitai o atunuu e pei o Vanuatu ma Tuvalu.
O loo finau Tuvalu, afai e moni e lelei suavai ua lafoai mai e Iapani, aisea la ua faasau ai i ogasami o le Pasefika ae lē toe lafoai ane i vai o Iapani.
A o eseese ai la finagalo o taitai o le Pasefika i le faiga ua iai nei, o le fono ia Novema a le Pacific Islands Forum o le a toe talanoaina ai le mataupu lenei.
