E fā tausaga talu ona faailoa mai le pandemic poo le koviti ae o lea ua amata atagia mai le tulaga na iai vaega tupe sa mafai ona faamatuu ese mai super a tagata i le taimi o le faama’i ma e ono aafia ai le lumanai ma tupe e totogi e le au totogi lafoga.

Na faamatala e se sui mai le Super Members Council i le polokalame a le ABC o lea o le a misi e le toatele na tala i tua vaega tupe mai super, le interest poo le tului sa tatau ona o latou mauaina pe ana lē talaina i tua a latou seleni.

Fai mai le lipoti pe ā ma le 3 miliona tagata Ausetalia na tala i tua a latou tupe mai a latou super i le taimi faigata o le faamai.

E faalua ona faataga mai e le malo le talaina i tua o le super a le tagata ma e mafai ona oo atu i le 10 afe le vaega tupe e agavaa ai e tala mai i tua e fesoasoani ai i aafiaga o le koviti.