Ua faailoa aloaia mai e le Pulega o Faalavelave Faafuasei a Aukilani i le taeao nei le aafia ai o nisi o vaega i Matu o Aukilani i le afā o Gabrielle e ala i timuga malolosi faapea foi le malosi o le savili.
O lipoti foi ua faailoa ai le ono iai o suiga o ala matagi mo savili malolosi ma ua fautuaina ai Aukilani ina ia nofouta ma nofo tapenapena.
O loo iai pea le malosi o le afā o Gabrielle i lona tau amatamataga ma e iai le manatu o le a matuai faateteleina le malosi i le aoauli nei faasolo atu ai i le aso a taeao.
Ua fautuaina ai tagata uma o loo i Aukilani ina ia fesoasoani le isi i le tasi, tapenapena e tuua fale ae agai i nofoaga saogalemu faapea foi le nofouta i le motusia ai o le eletise.
E fautuaina foi le taumafai e faaitiitia le soona feoai o taavale i luga o auala e aunoa ma ni mafuaaga tatau, ina ia tuu gaogao ai le auala mo le faafaigofie ona feoai taavale mo auaunaga i faalavelave faafuasei ma i latou o loo taumafai e faamamā luga o auala mai ni laau pa’ūū ma nisi lapisi e ono faalavelavea ai feaoaiga a taavale.
O le lisi lenei o nofoaga fesoasoani a le Civil Defense mo Soo se aiga e manaomia nofoaga e nonofo ai pe afai ua le saogalemu fale ma laoa https://www.aucklandemergencymanagement.org.nz/flood-event-2023/civil-defence-centres-community-hubs-and-shelter-sites/
O le a toe maua mai se isi lipoti lata mai o le afā i le 2:00 i le aoauli nei.
