O le uluai taimi lenei ua auai ai sui mai atunuu o le Pasefika ma le ofisa o polokalame tau le siosiomaga a le Pasefika le Secretariat of the Pacific Regional Environment Programme (S.P.R.E.P.) i le fonotaga faalesiosiomaga a Niu Sila ma Ausetalia poo le Environment Institute of New Zealand and Australia (E.I.A.N.Z.) i Aukilani.

E pei ona faafoeina ai le aso mo le Pasefika a o lei amatalia le fonotaga a le E.I.A.N.Z. sa faafoeina lea e le S.P.R.E.P. i se faigapaaga ma le E.I.A.N.Z. Stantec ma le New Zealand Association for Impact Assesment (N.Z.A.I.A.).

O lenei faamoemoe na faailoa ai le tulaga eseese o faafitauli aemaise o tali e foia ai aemaise o avanoa e faalauteleina ai le galulue faatasi o atunuu o le Pasefika ma nei faalapotopotoga.

Na laualuga ai i le faalauiloa o taumafaiga o loo feagai ma le Pasefika ina ia ausia le tulaga o auaunaga faaauau mo le puipuiga o le siosiomaga.

O lea fonotaga na auai ai sui o loo iai le tomai i le siosiomaga aemaise o i latou o loo galulue ia puipuia pea le saogalemu o le siosiomaga i gaioiga aemaise o faiga faavae.

O le aso mo le Pasefika ma le fonotaga o nisi nei o vaega o loo i lalo o le faigapaaga a le S.P.R.E.P. ma le E.I.A.N.Z. lea na sainia i le tausaga ua mavae.