O le galuega sa avea ai ma sooupu i Samoa se ali’i ofisa maualuga o le fitafita o le puipuiga o le malo o Niu Sila a o faatino feutanaiga ma fesootaiga i le va o le malo o Samoa ma Niu Sila ina ua tulai mai le faalavelave na goto ai i gataifale o le motu o Upolu le manuao o le Manawanui, ua faailoa ai le tuuina atu i le ali’i o Commodore Andrew Brown o le faailoga tauāloa e ta’ua o le Distinguished Service Decoration award.
I le tulai mai o lea faalavelave i le aso 5 o Oketopa o le tausaga ua mavae, e lima masina o faamautū i Samoa lea ofisa maualuga o le fitafita o le puipuiaga o le malo o Niu Sila ma avea ai o ia ma sooupu o lona malo i galuega uma e pei o le auina mai o se auaunaga sa faia galuega o le aveesea o suāu’u uma mai le manuao.
O lea foi ofisa maualuga o le fitafita o le puipuiga a Niu Sila sa faia feutana’iga mo le aumaia o tagata māulu o le fitafita o le sami a Niu Sila mo le faia o ia galuega i le ogasami o loo goto ai lea manuao.
O le lisi o suafa o tagatanuu o Niu Sila ua maua faailoga tauāloa ona o a latou tautua i le amataga o lenei tausaga fou, ua aofia ai ma le ali’i ofisa o Commodore Andrew Brown.
Puna o Faamatalaga: https://www.rnz.co.nz/news/top/582987/navy-commodore-andrew-brown-awarded-in-new-year-honours-list
