I le 28 tausaga o auauna ma galulue mo le ofisa o le Komesina Maualuga o le malo o Ausetalia i Apia ni tamafanau a Samoa, o lea ua amana’ia e lea malo le tautua a le susuga Peter Alefosio ma le tamaitai le afioga Lemalu Christine Lemalu.
O le tamaitai Minisita o le va i fafo o le malo o Ausetalia ia Penny Wong na ia momoli le faamalo ma le faafetai i ia tamafanau a le atunuu ona o le la tautua i tausaga e tele mo le ofisa o lea malo i lo tatou atunuu.
Na tauaao ai e le minisita ni Tusipasi e faamauina ai le amana’ia e lea malo o le auaunaga a Peter Alefosio ma Lemalu Christine Lemalu, ma moomooga lelei mo i la’ua.
Na faaalia e le tamaitai o Lemalu Christine Lemalu, ua tele suiga lelei i le tele o tausaga o lana tautua, e lē gata i lona olaga faigaluega ae o faiga faapaaga.
E lagona ai lona agaga faafetai mo lenei mafutaga ua mafai ai ona faatupula’ia suiga lelei mo lona tagata aemaise o o tatou tagata.
Mo Peter Alefosio na ia faaalia o le lelei o le siosiomaga faigaluega ma le agaga galulue faatasi o le aufaigaluega, sa fiafia ai lona loto e usu i le galuega i aso uma mo le Ofisa o Ausetalia.
E lagona ai foi lona agaga faagaeetia ona o lea avanoa ua mafai ai ona galulue faatasi ma nisi o tagata faigaluega e naunau e fai ni suiga lelei.
O Peter Alefosio o le a mālōlō litaea i le faai’uga o le tausaga nei.
