Ua mafai nei ona agavaa tagata Niu Sila o loo aumau i Ausetalia i le faiga fou o le a maua ai o latou avanoa sitiseni.

O le suiga lenei na aloaia i le Aso Toonai ua mafai ai e tagata Kiwi ua 4 tausaga talu ona nonofo i Ausetalia ona agavaa e faatalosaga loa o latou sitiseni Ausetalia ma e le gata o le faaitiitia o le tau e totogi mo le talosaga ae o le aveesea foi o aiaiga sa fai ma pa pupuni i le toatele lea e moomia ai le ausia e tupe maua faapea le soifua maloloina o le maualuga faatapulaa e mafai ai ona talosaga.

I itu tau penefiti o lea foi o le a mafai ona maua e tagata Kiwi pe a maua sitiseni.

Ae i pepe a tagata Kiwi e fananau i totonu o Ausetalia, o lea foi ua le toe tau faatali se’i 10 tausaga ona faatoa sitiseni lea, ae o lea o le a maua lava i le taimi e soifua mai ai.

E $490 tala Ausetalia le tau e totogi mo talosaga nei, ma o se suiga ua tuufaatasia ai e nisi se petition poo se talosaga aloaia ma ua lesitala foi e tuuina atu i le malo ina ia toe faafoi mai pe refund le faitau afe o a latou tupe ua uma ona totogi ai talosaga mo nofomau.

O tupe nei na totogi mo talosaga nofomau ma o lea na faaleaoga uma ina ua sau le faasilasilaga i le masina o Aperila o le a agavaa i avanoa sitiseni, lea ua aloaia mai le Aso Toonai.