Ua aloaia e le Palemene le faaiuga a le faamasinoga sili ua faamuta ai le faasalaga na faamalolo lē tumau ai mo le 24 masina le sui faipule o Lepa ma le faipule o Faleata 3.
Na manino lea tulaga i le saunoaga a le Fofoga Fetalai i le toe tauaofia o le fono usu a Samoa i lenei vaiaso, peitai ua faailoa e le Fofoga Fetalai le susuga Papalii Li’o Oloipola Ta’eu Masipa’u, e lē fesopoa’i faaiuga fai a itutino faafetauagai e faasino i le Palemene ma le Faamasinoga o le mafuaaga lea o le tālia ai o se iloiloga o le faaiuga e le faamasinoga o talosaga toe iloilo a le faamasinoga maualuga o le a tagofia le apili a le Palemene i le masina fou o Novema.
O le faatumau ma le suia o lea faaiuga o le finagalo lea o le faamasinoga o talosaga apili.
E lei auai le sui faipule o Lepa i le taualumaga a le fono aoao i le Aso Lua faapea le sui faipule o Faleata 3.
Ae i se tasi o mataupu i le lotoifale o sui usufono o le Palemene, o lea ua tali tetee le sui faipule o le itumalo palota o Sagaga Tasi (Sagaga 1) le afioga Loau Solamalemalemalo Keneti Sio i moliaga a le Fofoga Fetalai e faasino i lona lē fono i ni taualumaga a le Palemene i le masina o Aokuso.
O le lē talia e le sui usufono o lea itumalo palota o moliaga ua ave ai ma lana faamaulaloga i le Fofoga Fetalai, ina ua tuu iai le avanoa e le Fofoga Fetalai e saunoa ai ma tali i moliaga.
Le sui faipule o Sagaga Numera Tasi, afioga Loau Solamalemalo Keneti Sio.
