O faamaumauga sa tuuina e le minisita a le NZ First o Casey Costello i le Soifua Maloloina e faatatau i le toe fetuunaiga o tulafono e faatatau i le tapaa ua manino mai ai o le taofia mo le taimi nei o le lafoga poo le excise tax mo le tapaa, o ona ia manatu ma mafaufauga.

O ia faamaumauga na maua ai se kopi a le RNZ ma ua o latou lipotia o loo aofia ai ma fuafuaga mo le faamalolo o nisi o lafoga i le auaunaga e aofia ai le leai o se lafoga totogi i oloa tau tapaa.

O loo ia faamatala ai foi aafiaga o le nicotine e pei lava o le caffeine i le kofe.

Sa tu’i fesili le minisita lagolago o le soifua maloloina i le Palemene ina ua ia faailoa i le RNZ na te lei sailia ni faamatalaga mo le taofia o le lafoga i luga o le tapaa mo le tolu tausaga e ui o loo iai se pepa mai le Soifua Maloloina i le taimi nei o loo ta’ua ai sa ia faatino lea tulaga.

O loo ta’ua foi i le lipoti le mafuaaga e lē manao ai le minisita e faaitiitia le aofai o nofoaga e faatau ai le tapaa o loo ia ta’ua ai e tatau ona lagolago tamai pisinisi lea o loo avea le tapaa ma se tasi o oloa o loo maua ai se vaega tupe tele.

Fai mai le minisita i faamaumauga ia o le matuai lē fetaui lava i tagata taumafa tapaa pe afai ae faaitiitia nofoaga e faatau ai le tapaa.