E tolu aso ua afea ai Samoa i lenei vaiaso i le malaga taualoa a le Kovana Sili o le Malo o Ausetalia ma lona faletua, o le sui foi lea o le Tupu o le Malo o Peretania o loo faaao iai lea malo tuaoi.

O le Aso Tofi o lenei vaiaso ua amatalia ai lea asiasiga mamalu i lo tatou atunuu, e pei ona faailoa mai o le a feiloai atu le Kovana Sili ma lona faletua i le afioga i le Ao Mamalu o le Malo ma lana Masiofo, faapea foi ona feiloai i le taitai o le Malo le afioga i le Tamaitai Palemia.

O le a asia foi e le faigamalaga mamalu nisi o atina’e o loo fesoasoani mai iai le Malo o Ausetalia i le faatupeina aemaise o atina’e o loo tauala mai mo Samoa i faigapaaga ma lea Malo.

O le Aso Sa o muamua nei e pei ona faailoa ai i le polokalame, e tapuai ai le Kovana Sili ma lona faletua faapea lana aumalaga i le sauniga lotu o le taeao i le malumalu o le Ekalesia Faapotopotoga Kerisiano Samoa i Matautu Falelatai, ma o le a tali faaaloalo ai le afioga i le Ao Mamalu o le Malo ma lana masiofo i le taligasua o le toonai lea o le Aso Sa, ma sauni ai le faigamalaga mo le tuua o Samoa ma faaauau le asiasiga taualoa i isi atunuu o le Pasefika, e pei o Tonga, Kilipati, Tuvalu, le atu Kuki ma Vanuatu.

O le afea o Samoa o se faailoga o le mauaa pea o sootaga faalemalo o Ausetalia ma lo tatou Malo ma le atunuu.

O Ausetalia o se tasi o atunuu ua molimauina le toatele o tagata Samoa ua nopia’i ai ma avea ma o latou atunuu.

O se tasi foi o Malo o loo maua ai e Samoa faamanuiaga o galuega faavaitaimi ua tafe mai ai seleni ua fesoasoani i le atina’e o aiga ma nuu i Samoa.