O le siitia ai o faiga faavae faavaomalo a le Malo tele o Amerika i le sōsō mai e galulue ma ana paaga o malo laiti o le Pasefika, ua afea ai lo tatou atunuu i le amataga o lenei vaiaso fou, i se asiasiga a le toalua o le tamaitai Sui Peresetene o lea Malo tele o le lalolagi le susuga Douglas Emhoff.
E tāua tele i pulegamalo a le Iunaite Setete taitoalua o le latou Peresetene ma le Sui Peresetene ona e iai foi o la sao tāua i galuega faatino a lea Malo.
O le afea o Samoa o le a feiloai atu ai Douglas i taitai o le Malo, faapea foi ona iai se faatasiga o le a feiloai ai ma nisi o le aufaipisinisi a lo tatou atunuu.
O le vasega o tina ma tamaitai faipisinisi o le a aofia i lea faatasiga e pei ona faaalia i se pepa o faamatalaga mai le maota paepae i Uosigitone, o se faailoga lea e faamautu atili ai sootaga o Malo e lua.
Sa ui ane le Douglas Emhoff i Niu Sila e auai i le tatalaina o le Ipu o le Lalolagi o le taamilosaga soka a le itupa o tamaitai, ma faaauau mai ai i Samoa e pei ona taunuu mai i fanua i le afiafi o le Aso Sa.
