O le galuega o loo fausia ai nei ni malae o le taaloga soka i se vaega o le malae taalo o le Apia Park i le itu i Sasa’e o lea malaetaalo tele, na asia e le Peresitene o le taaloga soka i le lalolagi ma lana aumalaga, sa afea lo tatou atunuu i le faaiuga o le vaiaso.
O se tasi lea o galuega tele o loo faatupe e le FIFA le faalapotopotoga o loo pulea le taaloga soka o se taaloga malosi i le lalolagi ona o le tulaga tau tupe o loo faafoe ai.
O le asia o Samoa e le Peresitene sa feiloai atu ai i le afioga i le Sui Palemia o le tatou Malo le afioga Tuala Tevaga Iosefo Ponifasio, faapea ma taitai o le pulega o le taaloga i Samoa.
O le Aso Sa sa faatino ai se ava o le feiloaiga i le maota Samoa o le Pulega o Tagata Tafafao a o lei asiasia e le Peresitene ma lana aumalaga le nofoaga o loo iai malae soka o loo fausia i le Apia Park.
O le afiafi o le Aso Sa na toe tuuvaa ese ai lea aumalaga.
