O loo i Samoa i le vaiaso nei le faauluuluga ma le failautusi o le ofisa tutotonu o Malo o le Pasefika le susuga Henry Puna sa avea ma Palemia o le Malo o le Atu Kuki a o lei filifilia i lea tofiga maualuga.

O loo autu lona afea o le tatou atunuu i le feiloai atu i le taitai o le Malo le afioga i le tamaitai Palemia, Afioga Fiame Naomi Mataafa, ma faia ai ni talanoaga i mataupu o loo ave iai le faamuamua a atunuu o loo avea ma sui o le faalapotopotoga o Malo o le Pasefika le Pacific Forum.

O se avanoa foi lea e faia ai talanoaga ma sui o faalapotopotoga tuma’oti e folasia ai ni mataupu o loo manaomia ai le sao o Malo o le Pasefika e fesoasoani ai i le faaleleia ma le siitia o auaunaga tuma’oti.

O le faatoa malaga mai lea i Samoa o Henry Puna i lona tulaga o le failautusi o le Forum talu ona filifilia.

O le faatoa faatino foi lea o lona tiute o le malaga e feiloai ma taitai o Malo o le Pasefika, i le tuanai o vavao o le faamai koviti sa tapunia ai tuaoi o atunuu.

O le Aso Tofi o lenei vaiaso o le a faia ai se faatasiga i le faletalimalo o le Taumeasina o le a faia ai se folasaga a le faauluuluga o le ofisa o Malo o le Pasefika o le a ia fofola ai nisi o vaega ua ausia o fuafuaga a Malo o loo avea ma sui o le faalapotopotoga talu ona tulai mai e tauave le tofiga.

Ua faamoemoe a tuua Samoa ona malaga lea o le failautusi i le Malo o Ausetalia o le a feiloai ai ma le Palemia o lea atunuu.