A o feagai ai tagata i Aukilani ma le faamamāina o nisi o mea na aafia i le loulouā o le tau i le aso ananafi, ua lipotia mai i le asō le faaleagaina o le tele o fale i Taranaki i Saute ona o se asiosio na aafia ai i le vaveao analeila.
Fai mai le lipoti a le Leitio faasalalau a Niu Sila e tele fale na aveesea taualuga i le malosi tele o le asiosio ae o le itu e faafetai ai le toatele ona e foliga e leai se tasi o aafia i ni manu’aga.
O loo galulue le vaega o fesoasoani faavavave i le kiliaina o uaea eletise na toulu faapea laau.
Fai mai o le toe lima minute i le 6 i le taeao analeila na logoina ai le vaega o le tineimu ma fesoasoani faavavave i le asiosio lea o loo faagasolo pea nei iai galuega fesoasoani mo aiga na aafia.
I Aukilani ma nofoaga i le North Island ua maitauina le faaitiitia o timuga pe a faatusa i le aso ananafi ma o loo fautuaina pea le mataitu o tulaga tau le puipuiga ma ia silafia o loo iai pea lapataiga mai le vaaitau e ao ona usitaia mo le saogalemu.
