O le susuga ia Faaleagaina Malo o loo aumau i Magele i Aukilani, ua ia pueina se ata video ma tuu i luga o upega tafailagi ma ia faailoa ai lona faaaogaina o lana gagana Samoa e faiaoga ai i le faatinoina o lona togalaau aina i lalo o polokalame a Niu Sila. 

O Faaleagaina Malo ua 87 tausaga le matua o lona soifua ae o loo tumau pea lona malosi e galue ai. 

O le tama a lona afafine ia Ameena ua 15 tausaga le matua o ia lea o loo gafa ma le faatonutonuina o le pueina o ata o lona tamā, faatasi ai ma le fesoasoani a le tina o Ameene ia Ruta i le tuufaatasia lea o nisi o ata ma tuu i luga o le you tube chanel a le toeaina lea ua uma ona fai. 

O le faamoemoe maualuga o le susuga ia Faaleagaina Malo i lenei itulau, ina ia mafai ona aoaoina ai nisi o tagata Pasefika i le gaosia o a latou lava meaai aua lo latou soifua maloloina. 

Na malaga mai Malo i Niu Sila i le 1955 a ua 19 lena o ona tausaga, faatasi ai ma le fesoasoani a le uso o lona tamā ia Fale Malo, o Malo o se tamā na fiafia e totō meaai i Samoa, peitai ua malaga mai i lenei atunuu ua ese foi le tulaga ua iai eleeele poo palapala i le totōina lea o meaai. 

O ia eseesega o lona uiga o le toatele o tagata o lona nuu sa faia togalaau faisua i Samoa ua lē toe faia i Niu Sila e pei ona masani ai i Samoa. 

O le faasoa a le susuga ia Malo, ua tatau ia te ia ona ia tufaina atu le mea ua ia aoaoina e uiga i le faiga o togalaau, aemaise ai o le totoina o fualaau faisua e faaaogaina ai luga o upega tafailagi. 

Ma o se auala lelei lea e aapa atu ai i tupulaga talavou o loo ia popole o loo faalavelave a latou telefoni ma auala faatenekolosi ia latou.  

Ma o fanau laiti foi e le o fiafia e fai ni togalaau i le taimi nei. 

E oo foi i lana fanau laiti e le o mafai ona fai se togalaau ae iai taimi e o atu ai e fesoasoani. 

Ae o loo ia faamoemoe e iai le taimi e sili atu ona latou fiafia e fai togalaau pe afai ae matamata i ana videos, ma na te lagona foi e iai se tasi o lana fanau e mafai ona faaauauina lana galuega i se taimi o i luma. 

 O ana ata videos uma o lo faaalia ai le faiga o faatoaga masani, e pei o le suaina o le eleeele ma le totōina, faiga o le faapalaga, faiga o le totō ma le puipuia mai faama’i o laau. 

O ana ata sa pueina i tua o lona fale o loo iai pusa e 40 o loo totō ai ana faatoaga e faatamilo ai ana fua o le tau malulu ma le tau mafanafana. 

O le susuga ia Malo ua leva foi ona auai i le Walking Samoans i polokalame a le Radio Samoa i Aukilani i le tele o tausaga ma o le ala foi lea o le faatuputupu pea o lona malosi e fai ana faatoaga.