E lei mamao tele atu le sauniga na faalauiloa ai nisi o Malu o le Malo ua siitia o latou tulaga faaleoleo ma siitia ai foi ma faamanuiaga tau totogi.
Ae o le faamanatuina o le aso o auaunaga tau fuimu i le lalolagi ua faailoa ai foi ma le siitia o tulaga o le 76 o alii ma tamaitai o loo tautua i lea tomai faapitoa.
E toa 15 tamaitai ma alii e toa 61 ua siitia tulaga o nisi ua faapaleina i tulaga o le Komesina lagolago o le pulega o tineimu ma galuega laveai, o le tulaga o le ofisa, taitai i le auaunaga fuimu, o le fuimu sinia ma le ofisa fuimu i le tulaga muamua ma le tulaga 2.
O le tasi lea o tautua i Samoa i galuega tau tomai faapitoa ua siitia le numera o alii ma tamaitai o le atunuu ua ofoina o latou ola ma soifua e galulue ai, e le gata i le faasaoina o meatotino a tagata e aafia i ni mu, ae o le faasaoina o soifua mai ni faalavelave e tutupu faafuasei.
O lea foi ua faaopoopo iai i le auaunaga o galuega laveai mo faalavelave faafuasei ma auaunaga tau tomai faafomai ma tausi soifua auā e manaomia i le taimi e aafia ai le saogalemu o tagata mai ni faalavelave e tutupu.
O le Aso Lulu na faia ai lea faamoemoe ae taualuga i le lotu tuufaatasi a lea auaunaga tāua ma le matagaluega o leoleo sa faia i le maota tatalo i le Mauga o Vaea, e faatāua ai le aso o galuega fuimu i le lalolagi.
