O le tausaga faaletupe fou ua amatalia nei o le uluai taimi lea ua faatatau ai e le Malo i ana fuafuaga tau tupe mo le auaunaga o le soifua maloloina se vaegatupe e 10 miliona tala mo le faalapotopotoga o fatuga’o lea o loo iai le vaaia ma le faagaioia o le falemai faamamā toto.
Faaalia e le pule o le faalapotopotoga faavae tau fatuga’o a Samoa, o le agaga faafetai lea i le Malo ua oo se tupe i le 10 miliona ua tuuina atu mo le faatinoina o galuega e tautua ai le falemai faamamā toto e le gata i Upolu ae faapea mo le motu i Savaii.
E leai se isi alagatupe o faamoemoe iai lea auaunaga ua na o le Malo o loo faatupeina, faaopoopo iai ma fesoasoani o foai tupe mai le mafutaga a tina o le auuso fealofani a le ekaleasia metotisi, faapea le mafutaga a tina o le Ekalesia Faapotopotoga kerisiano Samoa le Tautua Puapuaga o tagata le TPT o loo maua ai nisi seleni faaopoopo i tausaga taitasi.
O le tausaga nei ua faaopoopo atu pea le agalelei e ala i foai ma meaalofa tupe, e pei ona tauaao e le pulega o le aufaipese a le Punialavaa le seleni e silia i le 63 afe tala mo le falemai faamamā toto.
O se koneseti faapitoa a le Punialavaa i le masina o Me sa saili tupe ai mo lea falemai na maua ai le seleni ua mae’a tauaao e le susuga i le faafeagaiga Lale Peteru ma le faletua o Vini Peteru ma lo la alo le afioga Nanai Violani, i le pulega o le falemai faamamā toto faapea le Minisita o le soifua maloloina.
Ua faaalia foi e le faletua ia Vini Lale Peteru o le pule sili o le Punialavaa, o le tausaga fou o le a faia ai se koneseti tele i Aukilani Niu Sila i le faamoemoe o ni seleni e maua ai, o le a tuuina faameaalofa foi i le falemai faamamā toto.
O le Minisita o le matagaluega o le soifua maloloina le afioga Valasi Luapitofanua Toogamaga Tafito Selesele na ia momoli le faafetai i le pulega o le Punialavaa i le agalelei, ma le aao mafola auā le tautuaina o le atunuu o loo autovaa atu mo togafitiga o gasegase o fatuga’o i le falemai faamamā toto.
Le afioga Valasi Luapitofanua Toogamaga Tafito Selesele o le minisita o le soifua maloloina.
