E to’a 58 i latou ua lipotia mai e le Matagaluega o le Soifua Maloloina ua pesia i le siama o le Koviti-19 e tusa ai ma faamaumauga mai le 2:00 o le aoauli o le aso 27 Iuni seia taunuu i le 2:00 o le aoauli o le aso 29 Iuni 2022.
E to’a 50 i latou fou ua aafia mai tua i le mamalu lautele o le atunuu ma le to’avalu (8) na faamauina na faimalaga mai i totonu o Samoa (border). Ua siitia ai le aofaiga o i latou ua aafia i le siama o le Koviti-19 i totonu o Samoa i le 14,964. E tumau pea fautuaga a le soifua maloloina mo le atunuu atoa ina ia aga’i i se falema’i lata ane mo le faia o tuipuipui o le Koviti-19, auā o le puipuiga sili lea e tetee atu ai i le ma’ema’eā o lenei vairusi.
Ua toe faamanatu ai pea e le matagaluega i le mamalu o le atunuu ina ia tausisia pea le faia o puni fofoga, tutū ma le nofo vāvā mo le lua mita mai le isi tagata, fufulu mamā lima pe a mae’a ona tagofia ni meafaitino ina ia faaitiitia ai le soona pepesi o le siama.
