Ua laumanu’ia ai nei se tapenaga faaletulafono o loo faamoemoe e tuuina atu ai se talosaga i le Faamasinoga Maualuga mo le faia o se poloa’iga lē tumau poo se interim injunction, e taofia ai le faamatuuina o tupe o le poloketi, ae tālia se finagalo o le faamasinoga i le tagi ua faaulu e le vaega e puipuia aiā tatau a tagata.
O loo fesiligia ai i lea finauga faaletulafono pulega lelei i suiga ua faia e le malo i le filifiliga o ta’ita’ifono ma sui o komiti o Fono Faavae.
I se tala lata mai o maliega na sainia i le vaiaso nei mo le faamautūina o vaegatupe o le poloketi mo le atina’e manuia o nuu ma afio’aga o itumalo, ua faailoa e le Palemia susuga Laaulialemalietoa Leuatea Polataivao Fosi i le feiloa’iga ma tusitala i le Aso Lulu ina ua mae’a le fono a le Kapeneta, ua limasefulu itumalo ua mae’a sainia maliega, totoe ai na o Faasaleleaga 2 lea ua taofia le faamatuuina iai o lana miliona valuselau tālā ona o tulaga feteena’i i finagalo o le itumalo ma suiga i le filifiliga o ta’ita’ifono o komiti o Fono Faavae.
O le Aso Gafua na saini ai maliega sa na o le 48 itumalo ona sa iai to’a i itumalo o Siumu ma Anoamaa 1.
