E to’a 41 le vasega fou o leoleo o le Malo ua aofia ai tamaitai e 21 ma alii e 20, ua sauni e faatino lo latou valaauina i galuega faaleoleo, ina ua mae’a ona faatauto i le faamasinoga, ma ua mae’a foi le 16 vaiaso sa feagai ai ma a’oa’oga.

O le afioga i le tamaitai faamasino sinia o le faamasinoga faaitumalo, afioga Talasa Lumepa Atoa-Saaga, sa saunoa apoapoai ma ave foi le faamalosiau i le vasega fou o Malu o le Malo, ina ua mae’a ona faia a latou tautoga i luma o le tamaitai faamasino.

Ua faaopoopo le 41 o le vasega fou o leoleo i isi Malu o le Malo o loo galulue i le tautuaina o le Malo ma le atunuu.

O le faaiuga o lenei vaiaso ua faia ai le faauuga mo le vasega fou o Malu o le Malo.