O loo tapena le isi fono o le Atoa o Samoa i le tausaga nei 2024 o le a toe feiloai ai taitai o Samoa e lua e faaauau talanoaga mo mataupu o le atinae o Malo o Samoa ma Amerika Samoa.
O le fonotaga lea ua faailoa i se lipoti o le a faamautu ai le fuafuaga na amata faatalanoa i le fono o le Atoa o Samoa sa usuia i Samoa Tutoatasi i le tausaga na tea nei, o le 400 eka o fanua o le Malo o Samoa i Togitogiga e faagaioia ai se atinae tau lafumanu e aofia ai povi ma mamoe.
O se atinae o loo fuafua e faagaioi e le vaega o le Food Security a le faigamalo a Tutuila ma Manu’a i le fuafuaga e lagolago ai ana polokalame o taumafa mo tagatanuu o le teritori.
Ua lipotia mai taualumaga a le fono a le maota o sui o le Senate a le faigamalo a Amerika Samoa, le fesiligia e nisi o Senatoa o lea fuafuaga, ma agiga ai atugaluga pe tua ma ni ā lea taumafaiga o le a faatupe i ni seleni mai le faigamalo tele o Amerika le US Federal government.
O loo finauina e afioga i Senatoa le tatau ona faatino se sainigalima i le va o faigamalo e lua, ina ia mautu ai aiaiga o le lisiina o le 400 eka.
O Togitogiga o se tasi lea o nofoaga o fanua faasao o le Malo o Samoa, o loo faatino ai nisi o poloketi e pei o le toe totoina o le vaomatua.
O loo iai foi ma nisi o atinae tau lafumanu papalagi.
O le fuafuaga i le lisiina o le 400 eka mo le atinae lafumanu papalagi a Amerika Samoa, ua faailoa ise lipoti ua iai povi ma mamoe ua amatga ai lea fuafuaga, ao talia ai le toe soalaupuleina i le fono o le Atoa o Samoa o le tausaga nei 2024, o le a talimalo ai le faigamalo a Tutuila ma Manu’a.
