O loo faaauau pea galuega faatino a leoleo ma auaunaga tau i puipuiga e taofia le oo mai i totonu o le atunuu o le tele o fualaau faasāina, e pei ona faamaonia mai foi le taofia ai e leoleo le oo atu i le 36 kilokalama le mamafa o ‘aisa o le cocaine na maua o aumai faananā i totonu o se pusa la’uoloa.
O lenei pusa la’uoloa na taunuu mai i Aukilani nei, sa aumai mai Brazil, ae na fuafua mo se tasi o pisinisi.
Faamatala e le Satini Sinia, o se leoleo su’esu’e faapitoa (Detective Senior Sargeant) Jason Hunt o le vaega o le National Organised Crime Group, na maua e nisi o tagata faigaluega nei pauta faasāina i totonu o ato o loo i luga o le tele oloa na avatu i totonu o le pusa la’uoloa.
E iai le talitonuga a malu o le malo, o ni gaioiga ua ta’ua i le gagana peretania, o le “rip on” or “rip off” importation o lona uiga o metotia ma auala a vaega poo kulupu o loo faatinoina gaioiga faasolitulafono e nanā ai pauta ma fualaau faasāina e aunoa ma le silafia e tagata e onaina oloa o loo aumai i pusa la’uoloa.
Faamaonia mai e ala i lipoti a le leitio faavaomalo a Niu Sila, ua galulue nei leoleo ma paaga faavaomalo e taumafai e sa’ili i latou e fesootai atu i lenei matāupu.
Ua faafetaia e le alii satini sinia le aufaigaluega mo le faafesoota’iina atu o le auaunaga e tusa ai ma lo latou mauaina o ia fualaau faasāina.
I faamaumauga o nei pauta faasāina e oo atu i le 12.6 miliona lona tau aofa’i, ae o le fiafiaga, ua vave maua ia ‘aisa ae le’i oo atu i tua.
Puna o Faamatalaga: https://www.rnz.co.nz/news/national/577682/cocaine-bust-36kg-found-stashed-inside-container
