O le faleaoga tulagalua o Apia, faleaoga tulagalua o le afioaga o Lepea ma le faleaoga o St Theresa o le a fausia i se fesoasoani a le Malo o Saina i le tau e tusa ma le $30 miliona tala.

I le sauniga o le suaina o le eleele e aloaia ai le amatalia o galuega o ia faleaoga e tolu, na saunoa ai e le Sui Palemia le afioga Tuala Tevaga Iosefo Ponifasio, ma ia faailoa o se avanoa tāua o le a toe fausia ai ia faleaoga i tulaga aupito sili ona lelei auā alo ma fanau.

O le faamoemoe o le fesoasoani a le Malo o Saina ia mautinoa e lelei ma atoatoa le tulaga o nofoaga ma faleaoga e faaaogā e alo ma fanau auā le a’oa’oina o le poto salalau.

O le a galulue faatasi le kamupani o le Zheng Tai Group ua ave iai le fausia o ia faleaoga ma le Malo e ala i Matagaluega o Galuega Tetele ma Felauaiga, Matagaluega o Aoga ma Aganuu, Matagaluega o Puna’oa Faalenatura ma Siosiomaga ma Eleele a le Malo, Faalapotopotoga o le Malosi tau Eletise ma le Pulega o le Suavai.

Mo le silafia o le fesoasoani foi a le Malo o Saina i tausaga ua mavae sa fausia ai nisi o faleaoga tulagalua ma faleaoga o nisi o kolisi maualuluga.

Ae o le fausia lava o faleaoga e pei ona auala mai foi i fesoasoani a le Malo o Iapani o se tasi o paaga totino a le Malo o Samoa, o le vaiaso nei na umusa ai le faleaoga fou tulagalua o le afioaga o Lalomalava i Savaii.

E $591,000 le tau o lea galuega na umusa i le Aso Tofi ma sa avea ai le Amepasa o Iapani i Samoa e fai ma sui o lona Malo e tauaao atu le faleaoga i le komiti, o le pule ma faiaoga o lea aoga tulagalua i Savaii.

E valu potu aoga, o le potu o faiaoga, o se potu tusi faapea faleui e faaaogā e fanau na fausia i lea fesoasoani.