O le aso muamua o le faamasinoga a leoleo le police tribunal lea o loo suesueina ai moliaga o le leoleo asiasi ma se tamaitai leoleo taai lua ona o le suesuega o le faalavelave tau taavale na maliu ai Tuuau Faasavalu, sa na o sui o aiga o i laua o loo molia ua faataga ona faafofoga i taualumaga o lea faamasinoga, ae o tusitala e lē o maua lea avanoa ona ua faailoa mai e se leoleo e lē faatagaina.
E ui ina tapuni mai le faitoto’a mo le galuega faasalalau auā le logopuialii o le atunuu i taualumaga o lea faamasinoga, ae ua faailoa e se molimau faatuatuaina sa auai ua na o folasaga a loia a itu auai na faatino i le Aso Gafua ae o le Aso Lua o lenei vaiaso o le a amata ona valaau ai molimau a leoleo, lea e toa 26 i latou o le a faia a latou molimau tuu fofoga.
A mae’a ona suesueina ia molimau ona avanoa lea o le loia a Malu o le Malo ua tuua’ia i le tuuina atu o ana fesili i molimau a leoleo.
A mae’a lea tulaga ona faatoa valaau ai lea o molimau a le leoleo asiasi ma le leoleo taai lua o loo molia, ma e na o le lua molimau o le a valaau e aofia ai ma le Minisita o Faatoaga ma Faigafaiva, le susuga Laauli Leuatea Polataivao Fosi Schmidt.
O moliaga o loo suesueina o le faia lea o se suesuega e Malu o le Malo o loo tuua’ia e aunoa ma se faatagaga a le Komesina o Leoleo, Falepuipui ma le Fuata’ina.
O le tamaitai loia o Leone Mailo o loo finauina moliaga a leoleo, ae o le loia o se King Counsel mai Niu Sila o loo tulai mo le itu o loo faasaga iai moliaga.
