O le agalelei o le vaega o leoleo o le Malo o Ausetalia i lana faigāpaaga ma le Matāgaluega o Leoleo, Falepuipui ma le Toe Fuata’ina, e lē o utuva pea le sasaa mai auā le fia fesoasoani i le siitia o meafaigaluega e faaaogā e leoleo i Samoa, ae faapena foi i le faalautele o le a’oa’oina o malu o le malo o Samoa.
E to’a luasefuluono leoleo ua faamanuiaina i ni avanoa sikolasipi ua ofo mai e leoleo o le malo o Ausetalia e a’ooga ai e saga faalautele o latou tomai.
Ua faaopoopo i ia avanoa sikolasipi ma se foa’i mai leoleo o lea malo o ni laei o ofuvae vae uumi e faaaogā tonu lava i le faatinoina o tiute faaleoleo.
O lea foa’i e pei ona faailoa e le Matāgaluega o Leoleo, Falepuipui ma le Toe Fuata’ina, o le a fesoasoani i le tulaga solo lelei o galuega faatino a alii ma tama’ita’i malu o le malo.
O le alii leoleo sinia mai Ausetalia o Superintendent Simon Penny sa ia foa’i lea fesoasoani ma faapea foi ona ia faailoa avanoa sikolasipi mo leoleo o le malo o Samoa.
