E 21 taavale a le malo o le a faatau ese i se faatautu’i e pei ona faailoa lautele e le vaega o le matāgaluega o le tupe o loo vaaia lea tulaga.
O taavale o le a faatau ese ua aofia ai ma le taavale o le ituaiga o le Prado sa faaaogā e le Fofoga Fetalai i le paea’iga talu ai a le Palemene faapea ma le ituaiga lava lea o taavale sa faaaogā e le minisita sa vaaia le matāgaluega o pisinisi alamanuia ma leipa.
E 14 matāgaluega a le malo e ana ia taavale e aofia ai le Matāgaluega o Leoleo, Falepuipui ma le Toe Fuata’ina; Matāgaluega o Tupe; ofisa o le Su’etusi Sili; Pulega o Tusipasi ma Faailoga; Matāgaluega o Faamasinoga ma le Faafoeina o Faamasinoga; ofisa o le Fono Aoao Faitulafono; Matāgaluega o Faato’aga ma Faigāfaiva; Matāgaluega o le Soifua Mālōlōina; ma le ofisa o le Komesina o Sulufa’iga.
O le Aso Lulu o le vaiaso a sau e faia ai le faatautu’i poo le auction sale i le lotoā a le malo i Vaimea, ma e lua aso e tuuina atu ia i latou e manuia a latou ofo e totogi ma aveese ai a latou taavale mai le lotoā.
