I le lata ai nei i le 30 tausaga talu ona faatuina i Samoa le sosaiete e puipuia meaola e pei o pusi ma taifau, ua oo atu galuega fesoasoani a le sosaiete i nuu ma afioaga i le togafitia o le taaloa o ia meaola.

O lea galuega e manaomia ai tele ni mea faigaluega lelei e pei o taavale, lea ua foai e le Malo o Iapani se pikiapu ua faatotoga uma i mea faigaluega mo le vaaia o taifau ma pusi.

E silia i le luaselau afe tala le tau o le taavale ua tauaao nei e le sosaiete e pei ona sa tauaao lea foai e le amepasa o Iapani i Samoa i le faaiuga o le vaiaso.

O le faamoemoe o le taavale ua maua o le a faaaogā i polokalame a le sosaiete o loo galulue ai fomai manu mai fafo o loo galulue fua, e faatino le launiu o taifau ma pusi.

O nai masina e lei mamao atu sa oo ai lea galuega i Savaii.

O le sosaiete e puipuia meaola o loo latou faaaogāina se vaega o le nofoaga mo lafumanu a le matagaluega o faatoaga i Avele o se fesoasoani lea a le Malo i le latou galuega o loo mafai ona maua ai togafitiga o meaola.