E 16 ‘au a lakapi fitu a alii ae 4 ‘au a tamaitai ua sauni i le tausaga lona lua lenei o le taamilosaga taitoafitu a le afioaga o Sapapalii i Savaii, lea ua faaigoaina o le Federal Pacific Mataniufeagaimaleata Sapapalii 7’s.
O se taamilosaga na faaalia e le faatonu o le taamilosaga le susuga Papalii John Taimalelagi, e atina’e ai le ola taaalo o tupulaga o le nuu, ae sili ona tāua o le tuu tonu o le taamilosaga i le vaiaso e faamanatu ai pea e Sapapalii le aso 24 o Aokuso na taunuu ai le talalelei i ona laueleele.
E mae’a le lotu faamanatu a le afioaga i le aso lea ae faagasolo lana taamilosaga lakapi fitu i le Aso Faraile ma le Aso Toonai o le vaiaso asau le aso 25 ma le 26 o Aokuso.
Le faatonu o le taamilosaga susuga Papalii John Taimalelagi.
O faletupe o le BSP ma le National o loo lagolago malosi i le taamilosaga, ma le kamupani o le Federal Pacific o le autu lea o tapenaga, faaopoopo iai ma nisi o pisinisi i le atunuu.
E 7 afe tala le faailoga tupe o le ‘au o le a siamupini, ma isi faailoga tupe e 4 ma le 2 afe tala.
E maua foi faailoga faaopoopo ma faailoga faapitoa.
Ua faailoa le auai mai o se au i Amerika Samoa i lea taamilosaga lakapi fitu, ae o le ‘au a le Tama Uli i Salelologa o loo umia le siamupini o le tausaga na tea nei, ma o le uluai siamupini foi lea i le tausaga muamua o le taamilosaga lenei.
