A o tālia ai i le amataga o lenei tausaga fou e pisinisi ma tagata o nuu o Safata ma Siumu le taimi e faasafua atu ai faamanuiaga tau tupe o le taui e sefulu miliona tālā, ua faailoa e le malo o Niu Sila ua oo i le sefululima miliona tālā le tupe ua ia faamatu’u mai i le Malo o Samoa e mafua i le goto o le manuao o le Manawanui i gataifale i saute o le motu o Upolu.
O le lima miliona o lea aofaiga tuu faatasi o tupe ua faamatu’u mai e le Malo o Niu Sila na tuuina atu i galuega a le Malo o Samoa sa faatino mo le puipuia o gataifale o nuu ma afioaga na aafia i suauu ma isi otaota mai le manuao ina ua goto.
Ua fa’aalia ai e lē sa avea ma Minisita o le Matagaluega o Punaoa Faalenatura ma le Si’osi’omaga o ia lea sa lotolotoi i galuega o le puipuia o gataifale o nuu ma itumalo na aafia, le afioga Toesulusulu Cedric Schuster, o le sefulu miliona o le taui ua talafeagai lea ma aafiaga mai le faalavelave na tupu i le manuao.
O lea finagalo o lē sa avea ma Minisita o Punaoa Faalenatura ma le Si’osi’omaga o le Malo o Samoa o loo lipotia e le leitio a Niu Sila. Ua faailoa ai foi i lea lipoti o feutanaiga sa faia ile va o malo e lua na faamautu ai se maliega ile va o le minisita o le va i fafo o Niusila ma le sa avea ma palemia o Samoa o le minisita foi lea o le va i fafo o le 10 miliona tala o le taui o le mutaaga lea e aunoa ma le toe manaomia e Samoa ose isi taui tupe. Ua faailoa e le palemia ua iai nei o Samoa o le tufatufaina o le taui e sefulu miliona o le a faatino e le malo, ma o le tuusao i pisinisi na aafia faapea tagata taitoatasi o aiga o nuu ma afioaga o Safata ma Siumu.
Puna o Faamatalaga: https://www.rnz.co.nz/international/pacific-news/582523/nz-s-been-a-good-neighbour-former-samoa-government-minister-backs-compensation-amount-for-manawanui-disaster
