I le faamasinoga sili lava a le atunuu, e 12 tausaga ma le 4 masina ua nofosala ai Edward Ulberg, ua ia ioeina le solitulafono o le fasioti tagata paivalea.
O le faaiuga lea a le afioga i le tamaitai faamasino le afioga Niava Mata Tuatagaloa, lea sa ia amata le fua o le faasalaga i le 18 tausaga.
Sa ia faaitiitia tausaga o le faasalaga ina ua mae’a ona ia iloilo finauga a loia a leoleo ma le loia mo lē ua faasalaina, ma ia faatāua ai le ioeina e Edward o le moliaga, o le sala i le nuu ma le ifoga na faatino i le aiga o lona toalua na maliu i lana solitulafono.
Sa muai molia muamua e leoleo le ua faasalaina i nisi o moliaga e aofia ai le fasioti tagata faamoemoeina ma le umia o se aupega matautia o se tamai agaese ae na talia e le faamasinoga le toe faaui i tua o ia moliaga, ina ua talia e le ua molia ma lana loia le tuuina atu o le ioega i le moliaga o le fasioti tagata paivalea lea ua faasalaina ai.
I se isi o mataupu na lauina i le Aso Gafua o lenei vaiaso le faaiuga, o se tama 33 tausaga le matua ua nofosala nei i le falepuipui i Tanumalala i le 5 tausaga ina ua ioe i le faia o se solitulafono tau feusuaiga i se teineititi 15 tausaga le matua sa i lalo o lana vaaiga.
O le ogaoga o le solitulafono ma le faatupulaia pea o ia moliaga ua aafia ai le ola saogalemu o fanau teine laiti, o se itu tāua lea sa ave iai le faamamafa a le faamasinoga i le faia o lana faaiuga.
