Ua 41 nei tausaga talu ona faaaogā e Samoa le agalelei o le Malo o Saina i sana fesoasoani o le avatu o alo ma fanau a le atunuu e aooga faasikolasipi i Iunivesite eseese i lea atunuu.
O le vaiaso nei na faailoa ai e le sui o lea Malo i Samoa isi avanoa sikolasipi e 13 ua aofia ai ma nisi sa maua muamua lea avanoa ae ua toe faamanuiaina.
O le sauniga na faailoa ma faamavae atu ai foi le Malo i ia fanau a le atunuu o le a aooga i Saina, na faailoa ai e le Minisita o Aoga Taaloga ma Aganuu le agaga faafetai o le Malo o Samoa i le faaauau pea o faigapaaga lelei ma lea Malo, ma le tuuina mai pea o avanoa e aooga ai alo ma fanau a Samoa i le aoaoina o tomai eseese i totonu o Saina.
O le sauniga foi lea na faailoa ai e le sui o le Malo o Saina i Samoa le mauaa pea o sootaga o atunuu e lua, e fua i le agalelei pea o lona Malo i polokalame fesoasoani mo le tamaoaiga, faapea isi auaunaga mo le soifua maloloina, ma le atina’e o faatoaga.
Na afea ai foi e le sui o Saina le nofoaga tutotonu o tu ma aganuu i Malifa sa fausia i se foai mai lona Malo, ma o le nofoaga foi lea na faailoa ai sikolasipi e 13 ua ofoina mai e Saina.
